Archive | December, 2011

يا جماعة خلّص الشتا ؟

صيّفوا الأوادم ! والشباب ليلحين شورتات و دشاديش صيفية الصبح ! إلا البنات ما استانسوا بالبرد و مصريين يلبسون بوتات…و حتى الشركة الفرنسية Ego Paris صيّفوا معانا و نزّلوا KUBE  الكراسي (متعددة الأغراض) الصيفية العجيبة، يعني تبيها كراسي تصير، تبيها طاولة قهوة تصير بعد ! على فكرة تذكرون موضوع (شفيه سطح بيتكم؟) اللي كتبته قبل فترة ؟ هالكراسي تصلح تكون فوق سطح بيتك بعد ما تعدله…تعتبر Ego Paris من أشهر شركات تصميم الأثاث الخارجي سواء للأفراد أو الشركات كالفنادق و المطاعم. و على حسب ما قريت، الشركة دايماً تشارك في معرض INDEX في دبي المتخصص في التصميم الداخلي. فا يالله يا شباب جهزوا الشاليهات ما بقى شي على الصيف.

* مع كل هذا، مازالوا البنات يلبسون بوت !!!

 

 

 

 

 

 

Share via email

إليسا ! إشسوّت بعد ؟

إليسا يا محفوظ السلامة فنانة بس مو فنانتنا اللي نعرفها مغيرها، لا هذه فنانة (تعشق الرسم و الآرت). دراستها كانت في الآرت بعد و تقول إن امها بعد فنانة تشكيلية تشتغل في السيراميك.
مالكم بالطويلة…البنت قبل سنة قررت تصبغ أرضية ممر عندها بالبيت و هالسنه كتبت و إعرضت نتيجة قرارها المسكّت !!! في بلوقها Alisa Burke Blog

شوف شوف شوف شلون سوّته…

و مع البحث و التمحيص و التحري عن الموضوع لقيت وحدة ثانية تدعى Lori ! مسوية شي قريب على اللي سوّتة إليسا  على حسب ما ذكرت في بلوقها Paisley Wallpaper Blog و هو إنها قررت تشيل زل بيتها واللي لقت تحتة خشب (باركيه)  وبعد تنظيفه، صبغته بالطريقة اللي بتشوفونها…

ممممممممممم شغل عدل…

و هذه بعض الأمثلة عن أرضيّات الخشب المصبوغ !

* يا إلهي ! هناك هر ! لا بس الأرضية صج يا إلهي

Share via email

السماط و معجون الأسنان و علّق لا تعلّق…

تبي تعلق براويز وايد ومو عارف شلون ؟ ما تبي تخرب طوفتك أكيد ! أنا بعد كل ما بغيت أعلق شي أخاف أخرب الطوفه و كنت أتصل على واحد إيي البيت معاه دريل يعلق لي و يكلفني تقريبا 10 دنانير كل مره ! ليش ! عندنا دريل و عندنا مطرقه و عندنا نت بعد الله يخليه لنا هههه… لقيت طريقتن سهلين و ما يكلفون شي !

الطريقة الأولى :: إستخدم السماط (السفره البيلاستك) في تعليق براويزك

١- صف البراويز على الترتيب اللي تبيه (على الأرض).

٢- خلصت ؟ إقلبهم عشان يبين عندك مكان تعليقاتهم.

٣- ييب سماط (السفره) و إحرص انها تكون شفافة، و بقلم السبوره حدد البراويز و نقّط أماكن التعليق على كل برواز.

٤- خلصت ؟ حلو الحين لزّق السماط على الطوفة بالمكان اللي تبيه بلزّاق خفيف عشان يكون سهل بالشيل وما يخرب لك الصبغ.

*ملاحظه:: خل يكون مكان تعليق الصور أو البراوبز حد مستوى النظر عشان ما تحس إن الطوفه ومع تعليق البراوبز فاضيه

٥- يالله الحين بالمطرقة طق طق مساميرك، أو بالدريل.

٦- و علّق لا تعلّق.

المصدر:: ROOST Blog

هاااااااا شلون ؟ سهله ولا لا ؟ ههههه عيل ما قلت لكم عن معجون الأسنان…

الطريقة الثانية :: إستخدم معجون الأسنان في تعليق براويزك

١- حط شوية معجون أسنان على مكان التعليق على البرواز من ورا.

٢- حدد المكان اللي بتعلق فيه البرواز من غير لا تلمس الطوفه لين ما تتأكد من المكان، ذيك الساع خل البرواز يلمس الطوفة و شيله. راح يكون المعجون على الطوفة.

٣- الحين عرفت بالظبط وين راح إطق مسمارك.

٤- إمسح المعجون الزايد على الطوفه و البرواز.

٥- علق بروازك 🙂

المصدر:: The Industrial Cottage Blog

وبدّع لا تبدّع…

جربوها و اللي يجربها يقولنا ضبطت معاه ولا لا!

Share via email

الجرة الزجاجية…

 أحياناً الواحد يتوهق شلون يعبّي بعض الأماكن عنده في الصاله أو غرفة الطعام أو حتى الحمّامات (يكرم القاريء)…
ووده يحط إكسسوارات لكن ما يبي شي غالي بحيث إذا يبي يغيير بعد فترة ما يتحسف على السعر الغالي اللي قطه على القطعة. و إذا هذة مشكلتك بعد فما لك إلا حل واحد ماكو قيره (غيره)…الجرة الزجاجية، إي نعم الجرة اللي يتغيير شكلها بحسب ما تعبيها فمثلا: 

  • تقدر تحط فيها ورد !

 

  •  حط فيها الشي اللي يعجبك!

 

  •  تقدر تحط صابونك أو القطن (إذا بتستخدم الجرّات تكرم بالحمّام) !

 

  •  إترسهم حلاه ملوّن !

 

  •  و حتى لو فاضين بعد حلوين !

 المصدر :: Every Thing Fab Blog

Share via email

شفيه سطح بيتكم ؟

البيوت الحين ماهي مثل قبل (أووف حسيت إني من مواليد ١٩٤٧) ههه…
أول البيت لازم فيه حوش..و أكيد لأن المساحة تساعد .و الحوش يعتبر معقل المغامرات و التجارب الحياتية بأنواعها بالنسبه لنا واحنا صغار…وبالحوش عرفنا ضربة الشمس، ذبح الخرفان، تطبيق تجارب الزراعة اللي خذيناها بالعلوم و غيرها.

أما البيوت الحين، وبحكم المساحة نادر نلقى بيت فيه حوش، و إذا فيه يكون صغير. وانحكروا العيال ! بس يحوسون بالبيت أو بالسرداب !
قبل فترة، كنت حاضر كورس The Blogging Class by Khalid Al Zanki في Cinemagic بالسالمية، و عجبني سطحهم هههه اللي مسوينه مكان لعرض الأفلام (Outdoor) وقاعد أقول معقول والله نقدر نسوي نفسه بالبيت..إي ليش لا؟

شفيه السطح ؟ مغبّر ؟ و أغراض قديمة طاقتها الشمس لين قالت بس ؟ ولا مخزن كيربي ؟ أنا من الناس اللي ودي أغمض و أفتح القى سطح بيتنا جذيييييييييييييييييييييييييييييييه 🙂

المصدر :: Decorative Home Interior

*هذا الموضوع إهداء لوالدتي الله يطوّل بعمرها ووالديكم

Share via email